你妳 (已結業)

一直都想試下你妳，之前開喺元朗對於九龍人嚟講真係有啲遠。今日咁啱去開黃埔，就決定去必嘉街嘅分店買嚟試吓。餐牌都好多選擇，樣樣睇落都唔錯，真係有啲難揀。最後決定要芋泥肉鬆蛋餅、原味蛋餅同埋炭培烏龍珍珠奶茶。芋泥肉鬆蛋餅外層香脆，入面有流心煎蛋，然後有一層芋泥，再包住肉鬆。外層嘅餅同煎蛋好好食，芋泥嘅甜度啱啱好，估唔到同肉鬆都好夾。因為份量比較多，建議細食嘅女仔可以兩個人share食。原味蛋餅同芋泥肉鬆蛋餅一樣，有脆脆嘅外層同埋香滑嘅蛋，但係就冇芋泥同肉鬆，食落冇芋泥肉鬆蛋餅咁飽肚，想食得light啲嘅就可以揀呢款。炭培烏龍珍珠奶茶超香濃，烏龍茶味好突出，珍珠嘅份量比例啱啱好，食落煙韌，真係好好飲。舖頭出面嘅裝修都好靚，有長凳可以坐喺度等嘢食，又可以打卡影相。下次經過附近嘅時候，一定會再試下佢嘅吐司系列同埋其他特飲。