Mango X'press (已結業)

同朋友們0係尖沙咀晚飯過後，未夠滿足，又想見多陣，指定動作一定係食糖水。0係街頭行行下，我地都被一間橙色小店吸引到目光。呢間係外賣甜品店，以芒果做主打，所以裝飾以橙色為主好吸引人，門口仲有兩隻大大隻芒果公仔添。我地一行人叫左幾樣野食，當中最驚喜係芒果綿綿冰同珍珠奶茶豆腐花。《芒果綿綿冰》綿綿冰飛碟形，非常大份，有好多配料如椰果同小丸子。芒果肉好新鮮香甜，不愧係主打。綿綿冰好薄好幼滑，冰涼又有芒果味，好消暑。而配料中既小丸子都好特別，唔係一般好彈牙果種，係軟綿綿又甜甜既，好有口感。《珍珠奶茶豆腐花》豆腐花係佢地芒果以外既另一主打，口味絕對有違傳統。豆腐花本身製作時已有奶茶成份，食落有豆腐味亦有奶茶味，好特別。醬汁唔係傳統糖水，而係珍珠奶茶，好有心思。原來軟滑既豆腐花配彈牙既珍珠奶茶，又幾好口感的。兩樣唔關事既野擺堆一齊又好夾，不得不佩服佢地既創意。野飲方面都唔錯，但無咩特別。店主既創意，同新鮮既食材，價錢亦唔算貴，尖沙咀街頭又有新選擇了。