拼食三郎 (已結業)

聽住係石硤尾嘅朋友講，新蒲崗開左間「拼食三郎」，專食芝士火鍋，就同最中意食芝士嘅朋友一齊去試下啦～係黃大仙站轉小巴去到新蒲崗廣場，店家位於一樓左手面轉角。店面不算大，分左兩間舖，但坐位充裕。 打開menu就見到各式火鍋，就算蕃茄湯底都可以加芝士，搖身一變變做芝士鍋！我就揀左極品蟹黃雙重芝士雞鍋，同行朋友就揀左廣島蠔蕃茄鍋加芝士。每一款雞鍋都可配麵，我哋都揀左烏冬。另外，我哋加左芝士年糕、帆立貝同香芋魚餅～ 我嘅蟹黃鍋先到，一上菜芝士香同濃濃嘅蟹味令人未食都知正！湯底隨住芝士慢慢融化，越煮越濃，加上份量十足嘅蟹黃，香氣四溢，入口香甜。店家貼心地先將烏冬煮好，所以淨係放喺鍋中一陣，沾到湯底就可以食啦，唔洗等好耐。溫馨提示，芝士鍋要時不時攪拌先唔會痴底～ 火鍋入面仲有好多好入味嘅雞肉，超嫩滑呀～友人嘅廣島蠔鍋喺蕃茄湯底，除左香濃芝士味，仲有蕃茄酸甜香氣，中意清爽一d嘅朋友必試～今次最中意嘅配菜喺廣島蠔！又大又肥美，鮮甜冇雪藏味，係新鮮嘅！ 帆立貝，芝士年糕同香芋魚餅加入芝士鍋都好配～本身認為芝士鍋會好滯，但今次又唔會wor～一人鍋份量剛剛好，配料新鮮，湯底足料創新，抵讚。