Classified (荷李活道) (已結業)

某個星期六，同黎旅行既內地朋友逛蘇豪區，下午茶時間經過Classified，就入黎抖下。以前係港島上堂，有時都幾中意過黎食佢既薯條。估唔到短短幾年間，已經發展到有多間分店。叫左兩杯Cappuccino，水準正常，奶泡夠滑夠稠密。我其實未食午餐，朋友又係芝士控，就叫左個Three Cheeses Macaroni。呢個簡直係世間上最邪惡之物。面層係焗到好香脆既芝士碎，熱辣辣咁上枱，一拉起芝士再放入口果下既滿足感，完全掩蓋晒所有罪惡感。芝士味唔會太濃，不過偏杰身。通心粉本身無乜味，所以要撈混啲芝士一齊食。兩個女仔，一黎已經食左半碟，飽到上心口，真係好好味。不過建議大家一定要襯熱食。我地掛住傾計，慢慢食，但道菜一凍左，就唔係咁好味喇。