心齋 (已搬遷) 新店位置

心齋喺半山花園道，地點上唔算方便，但上到去真係有遠離塵囂既感覺。𨋢門一開，餐廳既裝潢，色調令整體環境平靜柔和，加上蘭花／佛像／宇畫等擺設，增加多一點東方色彩。雖然都係一班人坐大圓枱既中式餐廳擺位，但環境並不嘈雜。菜式都相當多元化，有平常中菜館見到既，亦有一啲較精緻既款式，用少見既食材黎烹調。先黎香草焗淮山猴頭菇熱下身，猴頭菇煲湯得多，食真係第一次，原來都幾爽口，加上濃烈香草味，感覺好新鮮！接住既蟲草花鍋筍浸鮮竹係我全晚最愛！湯頭味道鮮甜又唔過濃，腐竹索哂個湯既味道，令人愛不釋手。回鍋豆腐煲用豆腐取代豬肉，不減惹味，豆腐亦令呢個菜式冇咁油膩，煲類食物都可以有清新既感覺都唔容易。另一個必食既就當然係川式水煮鮮野竹笙。水煮魚平日係我既最愛，而竹笙口感，味道上其實都唔會取代到魚肉呢個係事實。不過竹笙有自己特殊既口感，亦可索到湯汁。令呢道菜式另具特色。而且個湯底實在香濃，加上有其他平時冇既配料如蒟蒻，令水煮乜乜既野有一啲新驚喜。不過我個人真係好食得辣，川菜既standard黎講呢個辣度略嫌不足。