探花 (已結業)

朋友生日特登搵d打卡餐廳比佢，呢間book mark左好耐，趁今次決定試試！餐廳坐位好闊落，環境好靚好多打卡位，中意花主題更加唔可以錯過，連餐具都係花形！中女都湧現少女心！開胃菜係話梅車里茄，聽講係浸左成晚，入口酸maymay,堅開胃！呢到d點心全部都好與別不同，款款都好想試！叫左個紅蝦多士，用紅蝦做中菜真係第一次食，高級左幾倍，而且係原隻蝦，點上佢個蝦膏醬食，唔會油膩！要試！跟住約咗個清心蘋果叉燒酥，造型真係兩個青蘋果，雖然細細個，但啲餡係好豐富。而鹹蛋黃竹炭蘿白絲酥餅，啖啖蘿白絲，而且唔會好乾，都唔錯煙燻素鵝係我全晚最鍾意嘅嘢食，店員一打開個蓋就有一股煙散開，打卡一流，而我係唔鍾意食紅蘿蔔同腐皮嘅人，一見到入邊有齊呢兩樣，本身興趣麻麻，但朋友極力推薦，結果一試難忘，所有餡料都好爽脆，夾雜着煙燻嘅香味，食唔出紅蘿蔔嗰種奇怪嘅味道，真係好鍾意好鍾意。而拔絲咕嚕肉，竟然係肉份量比菠蘿多，兩個人食都幾大份，d汁酸甜適中，肉炸粉都唔厚，仲係脆脆地而主食叫左鳳梨櫻花蝦炒飯，好欣賞鳳梨係新鮮唔係罐頭，d飯粉紅色好吸睛，炒到好乾身，配櫻花蝦食一流。