影片
更多
2014-02-20
572 瀏覽
咪睇個標題以為喺食開年飯之類，查實依餐喺生日飯，賀舅仔太太生日 ，咁啱佢生日時近農曆新年，又想試吓必勝客嘅新批，既然壽星女出到聲，想食乜都喺佢大晒，反正小弟對個新批都頗有興趣呀！所以，就趁教會活會完咗，未夠6:00pm就過咗嚟愉景新城嘅必勝客，唔使等就有位嘞，過多大半個鐘，未夠7:00pm門口已堆滿人晌度等位喇 。愉景新城嘅必勝客晌商場之內，睇佢個鋪就知，原先鋪位都唔算細，依家佔埋商場一角，連其中一個出入口都封埋就佢，面積大咗好多。老實講，揀鋪外嘅商場範圍位較鋪內好，原因喺開揚，唔侷促，加上放置少少盆栽，感覺唔會太冷清了無生氣 。雖然我哋請，但就由舅仔發辦，話晒佢點都應該知佢老婆口味啩。事先張揚試新批，所以新批「芝士7重奏」喺必然正選，再加兩個「半價升級優惠」小食，另叫多一個小食，仲有沙律、意大行麵、焗飯，就夠晒。 芝士7重奏小龍蝦帶子批 $189 「芝士7重奏」有兩款口味：菠蘿煙燻豬肉（普通$143 / 大批$179）及小龍蝦帶子（$148 / $189），我哋要咗後者，因為佢哋幾怕肥豬肉，所以小龍蝦帶子就穩陣啲。最鍾意做到個批好似花形，晌農曆年，特別有花開富貴嘅感覺，雖然
愉景新城嘅必勝客晌商場之內，睇佢個鋪就知，原先鋪位都唔算細，依家佔埋商場一角，連其中一個出入口都封埋就佢，面積大咗好多。老實講，揀鋪外嘅商場範圍位較鋪內好，原因喺開揚，唔侷促，加上放置少少盆栽，感覺唔會太冷清了無生氣 。
雖然我哋請，但就由舅仔發辦，話晒佢點都應該知佢老婆口味啩。事先張揚試新批，所以新批「芝士7重奏」喺必然正選，再加兩個「半價升級優惠」小食，另叫多一個小食，仲有沙律、意大行麵、焗飯，就夠晒。
芝士7重奏小龍蝦帶子批 $189 「芝士7重奏」有兩款口味：菠蘿煙燻豬肉（普通$143 / 大批$179）及小龍蝦帶子（$148 / $189），我哋要咗後者，因為佢哋幾怕肥豬肉，所以小龍蝦帶子就穩陣啲。最鍾意做到個批好似花形，晌農曆年，特別有花開富貴嘅感覺，雖然小弟唔迷信，「花開」同「富貴」絕對無必然關係，但賣相別緻總會令人食得更開心 。
既然叫得芝士7重奏，真喺唔喺浪得虛名，若非餐牌有註明，相信都無乜幾個人食得出有邊7款芝士嚟，包括：巴馬臣芝士、水牛芝士、布旺倫芝士、車打芝士、羅馬諾芝士、忌廉芝士及蒙特里傑克芝士 。而且，餐牌仲特意介紹佢哋嘅特點，不過，有啲描述就認真無謂，好似車打芝士，描述如下：「是英國最受歡迎和美國第二大暢銷芝士，銷量僅次於水牛芝士。」講完都唔知佢嘅味道同特性。
言歸正傳，個新批睇落焗得唔錯，批面除有小龍蝦肉，迷你帶子粒，仲有菠蘿、青瓜片、黑橄欖，加上脆脆芝心邊。7款芝士咪以為放埋晒一齊，食過之後，概略估計批面嘅芝士醬有布旺倫、羅馬諾及蒙特里傑克芝士混和（因為有啲芝士都未曾食過，都喺估計），而每件批中心有個波波形芝士，一食就知肯定喺水牛芝士嚟，而糝面嘅喺巴馬臣芝士，至於芝心邊用上兩款芝士，包括車打同忌廉芝士，所以你會睇到「芝心」喺鴛鴦色。材料配搭不俗，一如傳統必勝客嘅厚批，厚身而鬆軟，由於集多款芝士於一身，所以芝味無窮，入口香濃 ，怪不得個批嘅另一句口號叫：「滋味添錦繡」 。
凡惠顧必勝批，都可以利用「升級優惠」，以半價點選其中兩款指定美食，有小食，有甜品。
雞捧伴瘋薯 $55（原價）/ $27.5（半價優惠）其實即喺炸雞柳同薯條，伴普通茄醬，一大籃份量著實不少，直身薯條較麥記嘅粗少少，但炸得唔油，亦夠甘香；雞柳有4件，兩隻手指大細，所以，以原價賣到$55覺得有少少貴，況且，炸雞柳除咗香脆，亦無咩特別，如果醬汁加點心思、花款，會變得有賣點啲。故此，想食薯條，點「瘋薯條配煙肉及蜜糖芥末醬」或「瘋薯條配意式肉醬」會更好，比起依個雞捧伴瘋薯更有特色！
葡汁焗蔬菜 $50（原價）/ $25（半價優惠）時蔬有西蘭花、椰菜花同甘筍，一向必勝客嘅焗嘢都有板有眼，今次啲蔬菜唔會太腍，幾好，最怕過腍一食粉晒咁，只喺稍嫌個葡汁欠椰香，再重啲都無妨。
田園蜜糖雞翼拼格格薯塊 $65舅仔一向都被我哋哦佢成日食埋啲唔健康嘅香口嘢，蜜糖雞翼就格外開恩啦，一客有6件蜜糖燒雞翼，烤得金黃，算幾香幾好食 ；不過，啲格格薯塊完全唔得，一啲唔脆，淋晒，絕對喺一早炸好晒嘅貨色 。
煙三文魚雜果沙律 $76以幾款沙律菜及雜果沙律墊底，再加少少士多啤梨、藍莓、車厘茄做裝飾，陳鋪數大塊煙三文魚，沙律菜爽脆新鮮，煙三文魚燻香油潤，理論上都無得點輸，不過，伴自家製蛋黃醬，杰身到不得了 ，都唔知撈落啲沙律菜度，抑或搵啲沙律菜點嚟食好？還是用嚟點煙三文食？真喺唔知佢想點！簡單沙律菜搵啲油醋撈撈已OK啦。
千層肉醬闊麵 $69晌咁多款意大利麵裡邊，海鮮寬條麵及卡邦尼煙肉忌廉濃汁意粉屬於小弟心水，不過，依個千層肉醬闊麵我都幾鍾意。一層意大利闊麵皮，一層肉醬，層層相間，香濃美味，小弟就特別鍾意勁加巴馬臣芝士，超濃香！
車打海鮮焗飯 $71飯類方面，都見出咗啲新嘢，不過，依舊揀嚟車打海鮮焗飯，但今次個焗飯做得比較低水準，死因一喺海鮮料好少，死因二喺個法式車打芝士白汁好淡口 ，跟一般白汁差唔多，何來芝士味。
雖然外間都開咗唔少高水準嘅薄餅店，但都仲仍會幫襯必勝客，除咗價錢尚算實惠外，主因都喺佢不時出啲新款薄餅，次次都鬼馬有心思 ，未必款款又夾又好食，但總會有不時驚喜！
張貼
