The Chippy (耀華街) (已結業)

英國菜出名無啖好食，惟一一樣令我鍾意的就係炸魚薯條fish & chips。是日來到銅鑼灣呢間英倫風小館，一試餐廳的皇牌英國菜午餐。Chippy 特色炸魚配薯條 $68剛上枱就見到，炸魚比起預期的大塊幾多，下面再有粗切薯條，以午餐來講分量算多。我認為好食的炸魚，首先要外層炸得香口、乾、脆，內裡的魚肉依然濕潤，而且外層脆漿不會同魚肉分離。而今次食到的呢份炸魚薯條，能做到外脆內軟，魚肉keep到口感而不會變乾柴，幾好！粗切薯條的薯肉較多，食起來更有口感同滿足感。香脆炸雞配薯條 $58炸雞質素一樣幾好，我幾鍾意外層炸粉偏薄身，食落不太粉，亦不太覺油膩感。另外想推介跟餐的醬汁──英式牛肉醬，牛味香濃，配搭比較香口的炸魚，好夾！主菜除咗薯條，以上兩款午餐均可選白飯/沙律，亦跟送可樂/零系可樂/雪碧。