光榮冰室 (登龍街) (已結業)

餐廳位於我公司5分鐘路程之內，就成為一間我最常幫襯嘅茶記。 午餐時間份外多人，所以通常我都會買走外賣，而且有好幾款美食我留意到係兩點之後先至有，適逢今日開OT，響做嘢之前先匆匆落嚟食個快嘅晚飯，當然要食一啲平時外賣買唔到而且午餐時段冇賣既嘢啦。砂鍋爆茜肥牛公仔麵，果然係爆茜，啲茜成座山咁高，加埋肥牛同公仔麵，食完齒頰留香，而且滿滿嘅蔬菜真係好健康哦！肥牛嘅份量亦都唔少，而且有少少沙嗲醬，唔多剛剛好。用砂鍋想更加係夠熱亦都夠好睇，不過少咗皮蛋，芫荽同我講佢有啲寂寞。嘢飲連碗麵都係$50左右，真係抵到冇朋友。