Coffee or Tea (已結業)

中西結合，將港式茶記同西式文青咖啡室嘅概念融合係呢間餐廳嘅特色！每款菜式外觀精緻，極具創意，而食材採用中式食品、亦以中式烹煮方式製作，令人忍唔住想試下呢種嘅combination！✎ 炒貴刁 下層用咗韮黃、芽菜同火腿整成芙蓉蛋餅，上面就用咗水晶粉同粉皮代替河粉嘅質感，仲加入自家製嘅咖哩粉作調味。整體嚟講，幾濃咖哩味，似星洲炒米個種咖喱味道～食落唔太油膩，有種清新同滑嫩嘅口感！✎ 脆脆公司三文治 外層係炸腐皮，中間用米紙包住蛋、煙肉、火腿同薄切蕃茄等用料，仲加咗啲芝士。腐皮非常脆口，呢款食落偏油膩，充滿蛋香同芝士香 ，反而冇乜蕃茄帶嚟嘅清新感覺。雖然有啲油膩，但係都忍唔住食落去，比一般茶餐廳嘅公司三文治好食。✎ 鴛鴦蛋蛋蛋治 用咗煎焗蒸煮四種方式去烹煮雞蛋，製作出玉子、蛋白、咸蛋黃同蛋漿嘅形態，再夾係酥餅中間，整體口感層次多變，一時試到滑嫩感覺，一時試到鬆軟而酥脆嘅質感！