大家姐 (已結業)

喂！「大家姐」等啦！佢不知不覺間已成為荃灣地標近呢年從新裝修過，不過無論堂食定外賣都係用即棄餐具，好唔環保囉！今日尊登帶定飯盒去買煎釀三寶，當我攞個餐盒俾男店員時佢有少少愕然，我諗真係好少客咁做，其實香港餐廳、外賣店同食客嘅環保意式都需要大大提升。不過該男員工好有禮貌。十蚊四件，叫咗魚旦、矮瓜、紅腸同韮菜角，件件都幾有份量，而且唔似用萬年油，唔會炸到黑麻麻，感覺比較健康，唔會滴油，都幾難得。魚旦足料密度高且彈牙，矮瓜多汁厚身、紅腸脆皮、韮菜角餡料不多但炸得香脆，全部唔加鼓油都好夠味。其實大家姐喺荃灣小食界價位算偏貴，路德圍龍津同東京站普遍平啲，而且質素同服務都唔錯，所以其實我比較少幫襯大家姐，但呢個三寶真係物有所值，值得encore之前都食過佢個串燒，個沙爹汁好好味，好多花生粒，$10~12一串，同樣值得推介。