M Kitchen (已結業)

以前住荃灣嘅時候都成日留意到有新餐廳開業，自從上年搬離呢個社區，都甚少再返嚟。今日晏晝約咗屋企人食個午餐，佢哋提議去一間開業冇幾耐嘅餐廳食飯，I mean why not?估唔到屋企人揀嘅餐廳質素都唔錯，裝修非常簡潔，環境氣氛幾好，令人好舒服。店舖門外有張牌寫住為香港人打氣，有自家製嘅飲品免費贈送，而家呢個社會氛圍底下，有一啲良心餐廳嘅窩心舉動實在比到好多正能量人。今次試咗一個番茄濃湯烏冬，用咗一個石鍋上菜，將蕃茄湯嘅溫度keep住熱之餘，仲好似火鍋咁可以灼牛肉。鍋入面有一整個蕃茄，味道鮮甜。放埋烏冬入去一齊煮一陣，令人非常滿足。食完之後唔夠喉，仲叫咗一個甜品。好耐都冇食過窩夫，叫咗一份，味道都唔錯，仲有唔同嘅生果配襯，上面仲有一球大雪糕，食完真係飽足感滿分！