牛の鍋日本料理

營業中

休息中

今日同朋友去荃灣行街，途經熊貓酒店見到有間好多人食嘅火鍋店叫牛の鍋日本料理，見到餐牌除咗平時食開嘅港式火鍋湯底之外，仲有一個幾特別嘅烤鰻魚火鍋，覺得好新奇所以入咗去試吓。個鰻魚煲好足料，可以揀醬香或者麻辣味嘅湯底，因為我朋友唔食辣，所以揀咗醬香味，鰻魚放入個煲前應該有沾咗少少粉輕輕烤過，唔會因為喺個煲入面滾得太耐而乾身，咬落去仲喺好有口感，魚身唔算多骨，仲要係無限添加，一定夠食。另外，即時like佢哋個社交平台page就會送多半隻麵包蟹。烤鰻魚食得到七八八，就可以加返醬香湯底繼續任食火鍋，火鍋材料有好多選擇，肉類例如美國極上牛肉、澳洲牛肩胛肉眼、澳洲羊肩肉、特選豚肉、草飼牛舌同五香雞件；海鮮例如鮑魚、海蝦、鱸魚片、大白蜆、紐西蘭青口、扇貝同韓國蠔肉；日式刺身同壽司；小食例如海蜇沙律、芝麻雞翼、串燒雞軟骨、燒菠蘿同台灣腸；甜品例如雪糕泡芺、牛奶燉蛋白、宇治抹茶芭菲同榴槤甘露；仲有雪櫃入邊嘅飲品都係任飲。整體嚟講，港幣三百幾蚊一個人食到超過150款任飲任食，性價比都幾高，我同朋友都食到好飽咁走，如果大家唔想咁悶食傳統火鍋湯底，都可以考慮試吓呢個烤鰻鍋！📍荃灣荃華街3號悅來坊2樓202號舖位