Deer Kitchen (荃新天地) (已結業)

今日同朋友去咗荃灣荃新天地嘅Deer Kitchen食晚餐，見佢哋新推出咗個幾靚嘅鳥籠二人套餐，所以嗌咗嚟試一試。餐廳入面嘅環境闊落，擺滿咗好多同鹿鹿相關嘅裝飾。兩人份量嘅鳥籠套餐就好似英式high tea咁分咗幾層，不過呢個就梗係冇咁講究，頂層有沙律、Parma Ham包蜜瓜、迷你芝士蛋糕同迷你macaron，前菜算正常發揮，甜品亦都唔算太甜。中間嗰層有龍蝦湯、明太子蟹肉酥盒、海苔魷魚同脆炸雞翼，龍蝦湯味道幾濃郁，有幾粒龍蝦肉，湯亦都非常濃稠。炸魷魚同雞翼都係新鮮炸起，咬落去仲熱辣辣。底層有澳洲草飼牛板腱扒同西班牙黑毛豬肉眼，煎牛扒嘅熟成程度啱啱好，唔會有血水，食落亦都有牛味，豬扒都無煎到好乾身，都仲有肉汁，配埋蘑菇汁一齊食都唔錯。跟餐仲包埋兩杯特飲，我哋揀咗藍色美人魚同熱帶果園，兩杯都係果汁溝咗梳打氣泡水，酸酸甜甜又有氣，都幾開胃！📍荃灣楊屋道1號荃新天地地下G06-07號舖位置就腳：🍊🍊🍊🍊 餐廳環境：🍊🍊🍊🍊食物味道：🍊🍊🍊🍊整體CP值：🍊🍊🍊🍊