明豐粉麵廠 (已結業)

好耐無買啦！雖然荃灣人都知香車街街市附近有好幾間名物，但基於位置考慮同時間問題，好難話去就去。今次就本來想食另一間，見無開就順便買盒餃返去。蓮藕雞肉餃，係盒面唔會見到依個名，因為款式不定期更新，除咗基本款之外都唔一定次次有，當然仲要睇賣哂未，雖然材料對面街市會一直幫佢補貨，但都要時間處理，加上存貨少到接近次次去都要等即包，其實真係唔得閒。荃灣餃子好多都好大隻，依間都唔細，對上過年買仲出現過巨無霸，因為原創人李太早已唔見佢包，近年見佢都係後倉出嚟，應該只負責餡料，始終餡料質素一直都保持到，但包法就次次唔同，今次個皮感覺就厚咗，唔知同包法有無關，但味道真係好，材料處理細緻，真係食唔出係雞肉！但都要講句，其實佢係粉麵廠。