正宗山西刀削麵店 (已結業)

嚟之前我完全唔知道同名嘅舖頭响荃灣原來有兩間！响沙咀道果間至係開飯網入圍熱店！咁响雄記隔籬嘅呢間舖到底係同一品牌旗下分店丫，抑或只係店名相同，兩間舖係毫無關係呢？有待各位巴打絲巴查證報料。言歸正傳，我今次就去咗荃興徑呢一間。兩位嚟到，是但叫少少嘢share試吓咩料。豆漿有煲燶底嘅味，豆味淡，水太多，得個甜。失敗！皮厚餡少冇肉汁，最離譜係個醋，疑似勾兑開稀咗。失敗！刀削麵厚身爽韌飽肚，可惜湯底太鹹；鷄翼合格。豬腸係唯一做得我認為好食嘅，爽口冇怪味，再入味少少會更好。埋咗單出咗問口問女友：「呢間嘢仲有冇下次？」女友不假思索、斬釘截鐵地答我一個字：「冇！」