Chalet (已結業)

自從搬離荃灣區後，才知道開了一間高水準西餐廳，所以一直都冇機會幫襯，今次特別同老婆返荃灣懷舊一下順便來呢度食嘢。裝修好有歐洲feel，有兩個用餐區，內廳主要係大枱為主，外廳大部分為雙人位，bar 枱設計，方便情侶拍拖傾計。剛巧我哋左右兩邊都係慶祝生日嘅情侶。晚餐由$288起唔包飲品，但九點前都係happy hour時間，大部份飲品有特價。頭盤餐湯係甘筍薑湯，味道甜中帶有少辣，幾特別的味道。半熟吞拿魚半三文魚子，呢個似日式西餐菜式，吞拿魚肉質鮮甜甘香，生熟程度控制得好好，一口咬落去啲肉有溶化感覺。美式燒烤醬豬肋骨配薯條，份量約為¾ rack，厚身肉質結實，亦唔會太肥，燒得剛剛好，肉好易離骨，燒烤醬唔會太甜，薯條炸得有水準，脆卜卜又甜，唔點茄汁食都夠味。法國麵包蟹燴意大利飯有驚喜，蟹味好香好濃，原來唔只得兩隻蟹鉗，飯入邊都有好多蟹肉一齊煮，啖啖肉連飯一齊食，鮮味十足。套餐甜品水準剛剛合格。