老馮茶居 (荃灣千色匯II)

📍 老馮茶居🗓️ 1 July 2023久唔久就想去飲茶食點心，雖然荃灣食點心嘅地方好多，不過環境靚，嘢又好食嘅我一定係會諗起呢間！老馮茶居係行懷舊路線，啲裝修好有心思同時呢到好多點心都好有特色。我哋今次四人叫咗十個點心/飯，非常滿足。分別係鮮蝦腐皮卷、咸水角、流沙芋泥包、鮮蝦腸、 XO醬蘿蔔糕、沙嗲金錢肚、豉汁蒸鳳爪、薑蔥牛柏葉、小籠包同埋梅菜肉餅飯。我發現呢到嘅炸嘢好出色，咸水角皮唔會好厚，好食。而腐皮卷外層好脆，而入面嘅蝦好大隻，仲要好彈牙，我有被驚艷到！流沙芋泥包喺出面唔常見，入面仲有芋頭粒，不過如果有多啲餡就好了。同埋唔知係咪放咗一陣先食，感受唔到流沙嘅效果。XO醬蘿蔔糕非常好食！我認為係今餐最難忘！炸到外脆內軟，就算放耐咗個皮都仲係脆而唔係硬嘅。又夠味又夠香口，我下次一定會再叫！所有點心熱辣辣，飯都係即叫即蒸，我下次想試下金沙米皇腸、千層糕同金牌炸芋角。不過記得要有心理準備要等位，如果兩點幾三點左右就會比較少人。