諾亞半熟蛋糕專門店 (已結業)

諾亞由最初賣半熟蛋糕, 變成依家有另一主線芝士蛋糕. 一向對日本淡味芝士蛋糕都有好感, 但依家潮流唔興, 冇乜日式芝士蛋糕賣, 知道諾亞有近似款式, 諗著睇吓.去到分店, 見到芝士蛋糕都有好幾種, 有芒果, 草莓, 香芋, 又有小黃鴨同熊仔造型. 見到草莓芝士蛋糕顏色鮮艷, 比較新鮮吸引, 就買一個兩口子試食.因為買完仲有一段時間先會食, 店鋪會提供乾冰，約可保存兩小時.同店見另有燈膽玻璃樽型飲品, 有蜂蜜紅豆水賣, 見價錢唔貴個玻璃樽外型又咁靚, 可以留番嚟插花, 買多樽紅豆水試吓.番到屋企已經超過兩小時, 乾冰已經溶哂, 但個蛋糕底依然好凍. 蛋糕切開時覺得比較軟身, 好難切得整齊. 上層放滿新鮮草莓同草莓味果凍, 中層係草莓忌廉芝士, 下層係朱古力蛋糕. 蛋糕食味比較接近日式芝士蛋糕, 芝士比較淡同軟滑, 同平時食開紐約芝士蛋糕濃味完全唔同, 輕盈可口, 加上新鮮草莓, 酸甜適中.跟著飲埋蜂蜜紅豆水. 紅豆水係近期好hit健康飲品, 據聞可以去水腫. 飲落有淡淡紅豆味, 加上蜂蜜甜甜地好入口.