上海榮華川菜館

營業中

休息中

今日誤打誤撞入咗呢間上海餐館。舊式玻璃門，木製餐牌、雲石牆磚令我相信店舖喺觀塘屬於老字號，係觀塘一直屹立不倒，實在難能可貴。餐廳有二人套餐，兩款小菜加湯只係$206，即管試下！上海榮華川菜館既獅子頭算係我食過最大粒。外形相當完整，唔會輕易散開。肥瘦比例剛剛好，入口即化，佐飯真係一流。奶油津白醬汁非常香濃，配上火腿碎更滋味，不過菜嘅份量略嫌太少。湯方面我哋叫咗雲吞雞（另加$25），份量真係十足，雲吞有四大粒，雞件有四五大件。湯吸收晒雞件嘅精華，所以香濃馥郁。我哋亦加左$15要一個擔擔麵。麵條帶點煙韌，味道酸酸辣辣，夠晒惹味。最後每人仲有杯八寶茶。八寶茶入面有菊花、杞子、紅棗等等。以上嘅食物比較濃味，飲完非常清甜嘅八寶茶後可以清一清喉嚨，同油膩講拜拜👋🏿。作為東九CBD2，觀塘近年越來越多活化或重建項目，本土小店承受高昂嘅租金，實在難以經營。市區重建係無可避免，但希望具香港本地特色嘅店舖可以一直延續下去，自己作為一個香港人唔想香港失去一間咁高質素嘅上海餐館，唯一可以做係多啲光顧榮華川菜館，一直榮華富貴下去。