Quezon Pinoy Food Express (已結業)

Quezon Pinoy專賣菲律賓食物，由駱克道搬咗過嚟石水渠街，可見小鋪捱租都唔易生存，不過佢都做咗好幾年，可見小店都有一定捧場客，而且售賣唔少特色糕點，貪得意一試無妨。這晚跟食友飯聚，喜獲靚女食友贈予一件「蛋批」，拎起非常墜手，咁夠份量，就一於當第二朝早餐，正呀！不過，見其他食友所贈嘅喺「椰子批」，似乎仲正仲特別喎，但乜批都好，都喺老友一番心意，絕對無得比。其實，印象中，菲律賓菜都好似無乜接觸過，咁今次又難得可以試番一下。個蛋批以牛油撻皮嚟做個批底及批邊，算不上好重牛油味，但做得夠薄身，唔會一舊粉咁；而中間吉士蛋漿嘅滑溜度，跟我哋中式蛋撻嘅有得揮，不過蛋味唔算好強，而面層亦比蛋撻烘得較為焦黃，但奇怪又唔似葡撻嗰重焦香；甜度亦無想像中咁犀利，所以當甜品之餘，當早餐亦得，整體都總算唔錯，食完令人好飽肚添。謝謝食友令我有此機會品嚐菲式蛋批！