正宗上海生煎皇 (已結業)

自上星期病倒後，XO仔晚晚返屋企都被迫食白粥清腸胃，唯一只可以靠午飯時間偷食。適奉萬聖節，因身體不適早已決定夜晚唔會出街狂歡，朝早就專登穿起功夫裝，大玩另類制服誘惑，中午行咗去登龍街間「正宗上海生煎皇」扮龜仙人搵「小籠珠」應吓節。透過地舖門面o既玻璃窗可望到師傅們忙碌地工作，個個帶哂帽，廚房整潔企理，感覺衛生良好。小肥一枝公搵位一啲都冇難度。午餐時段o既點菜紙合共有兩張，藍色面嗰張為閒日限時供應o既套餐。細佬一心為找尋「小籠珠」醫肚肚，唔洗多諗已選定要點小籠包黎食！灌湯小籠包（$33）：小籠包每籠有四隻，上枱時出哂煙，証明新鮮蒸出黎，大家都要小心睇熱。小籠包皮層巧薄軟熟，「珠」肉餡心幼嫩柔滑湯汁夠，個人覺得好好味。蟹粉小籠包（$35）：蟹粉小籠包一籠有兩隻，每隻o既頂尖位置都可清晰睇到滿瀉o既蟹粉。同樣熱辣辣o既蟹粉小籠包除咗皮薄之外，其蟹粉更鮮香撲鼻，食落即嚐到大閘蟹獨特o既鮮甜，單單食兩隻真係有少少唔係幾夠喉，嘻嘻，結果當然係要追加啦！「正宗上海生煎皇」環境企理衛生，服務生友善且效率高。小店雖然主打生煎包，但當日化身為龜仙人o既XO仔立心為偷食「小籠珠」而來，最終一口氣食咗八粒正爆