郵票咖啡店

營業中

休息中

轉眼都有半年無黎，其實多年一直想試西式早餐，但我實在太喜歡食熱辣辣既湯麵喇，每次都忍唔住。第一次 Stamp 既西式早餐，連如何 order 都未知，查詢之下原來任揀 4 款，但某些食材需要加錢囉。嘩，萬聖節居然有驚喜喎！好好味，比出前一丁麵餐好食多倍啊 ﹗還是因為今朝無咩食客呢？不太忙可以做好一點呢？茄汁焗豆太陽蛋煎豬扒跟多士，我本來要太陽蛋架喎，但意外地變左西式半煎焗流心蛋，超高水準，無得彈，勁正呀 ﹗咁就算收唔投訴啦。薄薄蛋白滑溜溜包住濃稠甘香岩漿蛋黃，熱辣辣新鮮脆口多士塗上濃郁牛油，牛油香氣四溢，半溶狀態下躺在多士之上，部份已深深滲入多士之中 ﹗用多士盛住流心蛋隊入口，索索烚烚聲此起彼落，聽到都勁興奮呀，不能放手，太美味 ﹗童年回憶茄汁焗豆，最緊要室溫，翻熱會 over cook 就唔好食架喇。高質煎豬扒，師傅似乎萬聖節心情大好噃，連煎豬扒都煮得如此美味，唔係求期掉落炸爐既劣質乾硬油膩豬扒，非常 juicy 軟棉，慢煎香口既靚豬扒，正到痺！真係一雪前恥，我比滿分 ﹗