華苑酒家 (已結業)

見到報紙同OpenRice 嘅食評唔錯，尋晚就去試試。7:15pm落單，7:40個湯底先嚟到，只不過係一個非常簡單嘅鴛鴦鍋底，唔知點解要整咁耐。再等10分鐘先有火鍋配料上枱，有手打丸丶雞片丶鮮牛肉，但係主打嘅肥牛就唔見咗，再落一次order淨肥牛，等左第一轉啲嘢食熟埋，先有八片肥牛上枱，繼續落order肥牛，之後嗰啲剩係得肥膏同牛油嘅肥牛，根本食唔落肚。其他蔬菜係自助形式，自己喺雪櫃裏面攞，但係個雪櫃空空如也。原來$138x2，只食到八片肥牛＋20粒手打丸＋幾塊雞片和鮮牛肉。總括嚟講，火鍋配料選擇極少丶廚房出菜龜速丶食客手快有手慢就食西北風，辛苦樓面D姐姐，要俾啲客催完又催。雖然係兩個鐘任食任飲，其實一個鐘已經有多，因為根本冇嘢食，費事嘥時間坐喺度等。慶幸我哋仲有手打丸食，隔離枱啲食客，等左一個鐘都未有一粒丸，差啲要自己入廚房攞。去茶餐廳或者麥當勞仲好。