潮福蒸氣石鍋 (已結業)

入冬之後都未食過同火鍋有關的野，今日有緣之下黎左呢間粥底蒸氣石鍋。可能自己未食過的關係，所以好好奇成個過程係點。一黎見個侍應落左米落個鍋度，再放個隔係上面，上面就擺海鮮，冚蓋等蒸氣蒸熟米同海鮮。蒸唔同野食要唔同時間，全程都有侍應計時睇住，啱哂我呢d唔識整野食的人。海鮮就每人指定四款，每人一份唔係任食。我揀左石蠔、元貝、蟶子同鮑魚。蒸完出黎最好食的係蠔，因為蒸到蠔的鮮味，軟硬適中，本身又夠大隻夠哂肥，可惜的係只係個餐只係包一隻，唔太夠喉。鮑魚佢係配蟲草花，食落算鮮甜，只係太細隻。係等待的同時有乳鴿同燉湯食住先。燉湯係姬松茸燉螺肉，雞湯底。入面的料算多，大約半盅到。火侯都夠，起碼飲落雞味算濃。食完海鮮之後，可以任點其他野食，提供的選擇無一般火鍋店咁多，較為好食的有牛肉片同「污槽雞」。「污槽雞」因為落左紅酒同杞子，所以蒸出黎有淡淡的酒味，幾惹味，食完之後個人都暖番唔少。食到最後先至食粥，即係一開頭蒸果堆，我點左瑤柱鮮淮山粥。因為之前蒸完海鮮，佢地的精華索哂入d粥度，所以食落幾鮮甜下。價錢方面可能略為高左少少，海鮮果度如果份量可以大少少，同埋其他任食的食物可以多少少選擇就更好。