新華苑酒家

營業中

休息中

同事生日，一班同事同佢慶生，放工去旺角新華苑酒家食晚飯。本來是想食小菜，去到知道有任飲任食蒸海鮮，大家都贊成試下，因為一個價錢可以食兩個半小時，除了任食火鍋配料外，還有啤酒汽水任飲。脆皮燒乳鴿，每位有半隻，即炸即上枱，香噴噴，皮脆肉嫩。還有蒸花甲，蜆肉嫩滑冇沙。海鮮八選四，大大隻扇貝、鮑魚鮮味十足，爽口彈牙。美國桶蠔大隻肥美，蠔身脹卜卜，鮮味爽口。蟶子皇，肉質爽口又鮮甜。有多款火鍋配任食，手打鮮蝦丸彈牙、手打梅菜豬肉丸口感比較林。肉類、蔬菜類蒸出來原汁原味，保持鮮味！蒸馬拉糕，口感鬆軟，甜度適中。食蒸海鮮前，侍應已將材料放入鍋內，我們蒸海鮮的時候，精華會流落鍋內，食完蒸食物，粥就煮好，粥好綿，味道鮮甜。大大枝啤酒任飲，冇乜幾多間有。