漁釧 (將軍澳中心) (已結業)

幾鍾意漁釧呢間餐廳，耐唔耐就會搞啲特別嘅活動，好似之前食過嘅清酒配對夜，非常滿足，而且學到好多清酒嘅知識。今次知佢有藍鰭極鮮主題，我當然唔會錯過。炙燒吞拿魚沙律或網燒牛肉野菜沙律都幾大一份，而且吞拿魚份量好多，啲沙律菜又好新鮮，加入和風醬，非常開胃，最特別係加入天婦羅脆脆，增加口感而且好好味。燒日本魷魚一夜干大大塊魷魚乾好啱送酒呀，咬落彈牙而且香口，味道唔會好重可以加入少少薑蓉。本鮪魚六點盛(壽司)壽司嚟啦，藍鰭壽司六點盛，有大拖羅、中拖羅、赤身同拖羅蓉卷，入口即化，好香好好味呀。清酒蒸日本生蠔(6隻)生蠔用清酒浸住，上到嚟加熱四分鐘再焗三分鐘就食得啦，真係好重清酒味。陶板炭火燒雞開頭見黑黑哋，以為上錯咗菜，原來真係燒雞，味道比賣相好好多，啖啖肉食得好開心。海蝦雜錦天婦羅有三隻天婦羅🍤，仲有南瓜、菇、茄子同青椒，好豐富，卜卜脆，送酒一流。另外仲加咗2碗豚肉味噌湯，竟然有好多豬肉，好飲。仲有之前飲過覺得好唔錯嘅自家製梅酒，甜度適中，正。