番茄18 (觀塘工業中心)

營業中

休息中

今朝一早要過觀塘攞貨，出動勞力之前梗係要食飽啲，就去咗位於觀塘工業大廈嘅番茄18。雖然位處於工廈，但一入到餐廳環境即刻唔同晒，裝修都甚有特色，既光猛又坐得舒服。早餐選擇都幾多，而最吸引我嘅當然係佢哋嘅招牌湯底，所以我就揀咗招牌番茄叉燒湯米線配牛乳炒蛋，牛油厚多士。招牌蕃茄叉燒湯米線嘅蕃茄湯底非常濃郁，我仲見到佢除咗有蕃茄之外，仲加入咗洋蔥，所以除咗有蕃茄嘅酸，仲有洋蔥嘅甜味，好味又開胃。而佢嘅叉燒係屬於自家製，肥瘦適中，而且燒得都幾香口，如果可以再厚切啲就更加正喇！另外早餐仲配埋牛乳炒蛋牛油厚多士。牛乳炒蛋炒得好滑，顏色又夠鮮艷，無論淨食炒蛋、配多士，或加入湯米線食，都咁夾咁好味。特別要讚吓呢塊牛油厚多士，烘得啱啱好，表面香脆，而入面鬆軟，加上適量嘅牛油，真係冇得彈。另外加錢揀咗華田脆脆，上面仲有滿滿嘅阿華田粉，走甜嘅味道最適合我。另外仲揀咗兩款小食，瑞士汁雞中翼都係佢哋嘅鎮店之寶之一，每隻雞翼都脹卜卜，而入面嘅雞肉仲好嫩滑，配上鹹甜適中嘅瑞士汁，真係忍唔住食完一隻又一隻。最後我仲揀咗麻辣雙色餃子，黃皮嘅係粟米餃，而白皮嘅係白菜豬肉餃，配埋麻辣醬就夠晒醒胃。