堅韓牛韓燒放題 (已結業)

除左時代餐廳依d大件夾抵食既茶餐廳之外，蕭生仲係旺角開左間食韓式燒肉既放題店，主打頂級安格斯牛肉放題。今次襯放假黎到，我地試左佢地「頂級三國牛肉餐」，星期一至四5點入座7點左右離座每人$298，燒肉放題黎講都算好唔錯！隨餐附送有三款頂級牛肉，每款都各有特色，適合各種食法。「日本A4和牛肉眼蓋」肉味油脂感適中，點少少燒肉汁就好夠味。「澳洲M9和牛西冷」牛肉味最重，加少少黑椒鹽調味就最好！最後仲有韓國腩包肉，最適合就係夾生菜一齊食balance返油膩感！除左依三款特別牛肉之外，仲有美國安格斯牛任食！當中最令人驚喜就係美國安格斯肉眼排，真係好大塊同埋薄切，燒一陣已經食得，必食十分推薦。另外仲有多款韓國特色熟食可以任君選擇，例如有韓式炸雞，黑椒安格斯牛柳粒，雪濃湯，每款質素都好唔錯，依家去唔到韓國可以黎依道頂下癮啦！整個燒肉體驗都十分唔錯，完全冇漏單問題同埋店員都好快手幫我地落單同換牛油紙，值得一讚！