棠記雲吞麵 (已結業)

午飯時間，今日去咗呢間棠記，因為友人話呢間好食過信芳街嗰間，所以上嚟試吓嘞！叫咗碗雲吞河同一杯凍鴛鴦，都係十七蚊！果然友人所言非虛，雲吞河上枱賣相唔錯！特登叫河粉，因為咁平嘅粉麪舖嘅河粉好多時都好難唔碎唔斷唔發漲，我自問就係因為咁極少食河粉嘞！呢間棠記嘅河粉幼而滑溜，唔斷唔碎，正！雲吞好大隻，每碗都有四隻！數過每隻雲吞都有三隻蝦，而且豬肉肥瘦適中，有誠意之作！最驚喜係杯鴛鴦，又濃又滑，唔為碗麪都會為杯鴛鴦再嚟！望一望個煮麪師傅，比信芳街舖嘅師傅年紀大啲，果然薑係越老越辣，呢間真係正啲！