影片
更多
2016-04-23
571 瀏覽
久違嘅老友想約出嚟聚舊，想食得有特色，又想搵個地方喺適合暢談一番，免避騷擾，經食友推介就定晌佐敦嘅Luxury，話依度私隱度高，差啲連門面都搵唔到，幸得店家發嚟嘅「路線圖」。因為門面的確神秘，只有門牌，無餐廳招牌，看圖索驥認得門面盞懷舊掛燈。原來餐廳唔做walk in客，所以，餐廳內嘅座位都按當日訂座人數調整，以至客人都坐得舒適，空間感足，變相私隱度又高啲。因為是晚訂位唔太多，所以，餐廳環境顯得更寛敞，裝修平較平實，唔會太奢華，柔和嘅燈光下，感覺蠻舒服。此外，晌度喺採用開放式廚房，大廚做菜一目了然，不過，個廚真喺幾犀利，成晚見佢得一個人做菜，由前菜、沙律……到甜品，都喺由佢一手包辦，而且，我哋每個類別嘅菜式，都喺同時上枱，唔會你有湯飲時，我就仲要等！出面好多西餐廳都未必可以做到咁。餐廳都幾有個性，除咗要訂位外，所選嘅菜式亦要早一日定好。用餐時同店長傾談，原因喺食材都以當日訂位狀況嚟預備，務求每日都喺用上最新鮮食材，絕唔留過夜，亦減少損耗，感覺都環保啲。訂好位店方會whatsapp菜單俾你，咁佢依度只做套餐（前菜、湯品、主菜、甜品），由$350-$450+10%，視乎所選嘅組合而定，免開
原來餐廳唔做walk in客，所以，餐廳內嘅座位都按當日訂座人數調整，以至客人都坐得舒適，空間感足，變相私隱度又高啲。因為是晚訂位唔太多，所以，餐廳環境顯得更寛敞，裝修平較平實，唔會太奢華，柔和嘅燈光下，感覺蠻舒服。
此外，晌度喺採用開放式廚房，大廚做菜一目了然，不過，個廚真喺幾犀利，成晚見佢得一個人做菜，由前菜、沙律……到甜品，都喺由佢一手包辦，而且，我哋每個類別嘅菜式，都喺同時上枱，唔會你有湯飲時，我就仲要等！出面好多西餐廳都未必可以做到咁。
餐廳都幾有個性，除咗要訂位外，所選嘅菜式亦要早一日定好。用餐時同店長傾談，原因喺食材都以當日訂位狀況嚟預備，務求每日都喺用上最新鮮食材，絕唔留過夜，亦減少損耗，感覺都環保啲。訂好位店方會whatsapp菜單俾你，咁佢依度只做套餐（前菜、湯品、主菜、甜品），由$350-$450+10%，視乎所選嘅組合而定，免開瓶費，兩個月會轉一次菜單。故此，與其叫私房菜，小弟就覺得似「私房」西餐廳。
麵包籃開場白講咁耐，喺時候講食，先嚟嘅麵包籃已顯出誠意，大廚表示麵包全自家製，一小籃裡一口氣有4款（近至遠）：洋葱、芝麻、墨汁芝士、香草伴牛油及千島醬（唔喺撈沙律嗰啲，但味道有啲似），全自家手製，質素不俗，軟熟而各有特色。
先上前菜，一共有7款選擇：
白松露油凱撒沙律一人份嘅凱撒沙律喺要自己動手拌勻，將白松露醬倒下，撈勻，芳香誘人，沙律菜清新爽脆，配合鹹香嘅鮮西班牙巴馬火腿，油香緊緻，美妙之極。
日本廣島蠔三焗（荷蘭汁菠菜、脆煙肉芝士、芝士蘑菇）朋友「蠔」爽之人，揀道焗蠔做前菜就啱佢性格，再者，一次過試到3款口味，實在滿足。友人話除咗個脆煙肉芝士稍鹹外，另外兩款都好正，既突出到蠔味，亦帶出唔同味道嘅層次，而且，蠔無被焗乾，入口仍富蠔汁。
北海道帶子芥末青蘋果田園沙律小弟食前菜就較喜歡清新、爽口嘢嚟開開胃，所以，依道沙律喺不二之選。賣相清新精緻，驚喜位喺加埋少少黑魚籽及金箔，矜貴盡顯。青蘋果沙律入口清爽，帶點淡淡日式芥末味，引嚟少許刺激感卻唔搶喉；帶子切成薄片，鮮甜中由黑魚籽誘發陣陣鹹鮮，過癮；仲有伴碟嘅田園蔬菜，食得出新鮮度爆燈。
湯品共有3款選擇，啱啱好滿足到我哋各有所好。
蕃茄蟹肉忌廉湯蕃茄忌廉湯做得幾順滑，蕃茄味酸香鮮活，唔會單單得個濃字，更估唔到蟹肉落得一啲都無手緊，友人大讚好味。每款湯都伴有一條蒜蓉包條，焗到香脆無比。
意大利黑松露野菌忌廉湯甫送上枱已香氣十足，稀杰度恰到好處，口感綿密，小試一啖，黑松露嘅味道幽香已絕不霸道。
法式干邑龍蝦湯輪到分享吓小弟所揀嘅龍蝦湯，蝦味嘅濃郁絕無欺場，滑溜鮮香，不過，依度嘅版本喺唔加龍蝦肉，加咗自然比人感覺更增值。此外，下忌廉嘅手法上幼細啲，如畫少少花令賣相更好睇，相信客人更受落！
嚟到第一道主菜，喺3款意大利粉、1款意大利飯嘅選擇。一位朋友擔心食唔晒咁多嘢，就少要個第一道主菜，亦可以慳番少少（$395 + 10%），留待一陣嘅主菜再嘆過。北海道帶子龍蝦汁意大利飯
北海道帶子果然唔喺浪得虛名，既巨型，又鮮甜，輕煎後，外層微微焦香；而個飯亦唔失禮，飯粒濕潤有咬口，粒粒都沾滿惹味嘅龍蝦汁，整有水準嘅一道意大利飯！
紅蝦，新鮮墨魚汁意大利粉大廚話喺用上新鮮墨魚汁做，所以，風味特別，而意大利粉每炷都沾滿墨汁，食到我都一口烏黑，笑得朋友合唔埋口，此外，意粉咬口煮得啱啱好，紅蝦鮮甜、軟腍，有別一貫爽口嘅感覺。
主菜選擇都幾多，8款選擇，有魚、雞、豬牛羊，應該唔難搵到心水菜式。
慢烤澳洲羊鞍架配法國芥茉露絲瑪莉、焦糖菠蘿酥皮千層羊鞍架烤燒得外層焦香，內裡嘅羊肉嫩滑非常，羶味唔太重，相信好多人都接受得到，此外，仲會發現好多心思位，就好似啲伴菜，唔喺一般薯菜咁簡單，煙肉豆角卷、迷你燈籠椒、迷你茄子喺咪都好特別呢！但講到心思，件焦糖菠蘿酥皮千層最深得我心，菠蘿加沙糖煮至焦香再包酥皮焗，當道小甜品都得呀。
慢煮香脆黃油雞卷釀海蝦黑松露雞汁慢煮令雞肉熟透卻保持到肉質柔嫩細緻，煎封過使雞皮香脆可口，至於內裡捲住嘅海蝦，爽彈又有陣黑松露幽香，就連薯蓉都似喺香滑過人。
烤澳洲M5和牛肉眼肉眼以肉味濃見稱，但朋友話難得烤燒出嚟嘅效果有水準，選5乘熟， 肉質唔止仍保持肉嫩多汁，入口極有油香卻無咩膩口嘅感覺，肉味又果然夠濃郁，讚呀！
揀選任何一款套餐組合，都包括埋甜品，4款甜品，單睇名字，都各有千秋。
焗肉桂蘋果金寶伴自家雪糕店內嘅雪糕全部都自家製，穴喺不得不佩服店家嘅堅持，肉桂蘋果金寶做得小巧，新鮮即焗，篤開啲金寶，肉桂及蘋果嘅香氣即時散發出嚟！金寶嘅重牛油味，夾雜蘋果嘅酸香清香，幽幽嘅肉桂味，喺互相平衡所擦出嘅火花。雪糕揀咗綠茶味，濃郁軟滑，一啖灼熱、一啖冰涼，爽到極。
椰子革命（椰子燉蛋、啫喱、雪糕）友人喜歡法式燉蛋，所以相中椰子革命，而且，一次品嚐3樣甜點，又滿足埋多心嘅心態。燉蛋真喺做得頗滑，蛋香中滲出椰子味；椰子啫喱似粒棉花糖，口感軟綿，入口即化；椰子雪糕帶有絲絲椰子感覺，唔會太甜太假。
朱古力世界（朱古力心太軟、布朗尼、雪糕）朱古力迷就一定唔可以錯過嘅甜品，店長話所有甜唔都喺佢哋自家制，唯獨是件布朗尼喺來貨，但喺來貨都可以搵啲有質素嘅供應商，件布朗尼就絕對喺有質素，濕潤香濃；而心太軟爆晒漿，朱古力味超濃郁，外殼焗得夠薄，烘焗技巧拿捏得好；雪糕亦差唔到去邊，整體喺一份甜美嘅享受。
環境、上菜速度都令人舒服，食物有質素，部份細節位如主菜嘅時蔬、酥皮焗菠蘿粒都有啲驚喜，份量亦都恰到好處，和牛、羊架都煮得有一手，值得推介！不過，如包一杯餐飲，食甜品時襯杯咖啡，或花茶，客人感覺完整啲，始終一餐嘅消費都近$500，客人會期望高啲。
張貼
