Mee...lemongrass (已結業)

馬鞍山近呢一年新增好多食肆，其中東南亞都競爭最激烈，有泰國菜、越南菜、星加坡菜等等，最新加入嘅就有Mee lemongrass. 餐廳位置喺五期天橋旁邊，面口大大個招牌，好易揾！受疫情影響，加上係下午茶時段，無乜人。下午茶選擇非常之多，大大話話有成十幾款，我就揀咗個肉骨茶，加黑糖珍奶。肉骨茶相信係馬來西亞配方，湯頭較深色較黑，而且飲落有淡淡藥材味，仲見到有d杞子喺湯入面！肉骨茶當然唔少得排骨，一字排骨炆到好淋，輕輕一咬可以撕出肉絲，旁邊嘅豆卜同枝竹就吸收晒藥材湯嘅味道！黑糖珍奶係我估唔到佢整得咁好飲！佢用膠杯裝住，方便客人飲唔晒可以帶走。黑糖珍奶嘅琥珀顏色非常吸睛，飲到濃濃嘅牛奶味，但黑糖又唔太甜，配埋彈牙嘅珍珠，好飲！我一路食嘢嘅時候發現餐廳有一部分做外賣飲品，都有唔少人嚟買架wo ！我見到佢仲有好多款飲品，好似十勝牛奶紅豆、芝士奶蓋乜乜乜等，下次行過就算唔食嘢都可以食翻杯！