捌哥.捌哥特色馬拉茶啡廳

營業中

休息中

今日第一餐叫豐富啲，細滲，咖央多士，蝦麵，喇沙，愛他愛她，美祿恐龍同馬來拉茶。先黎兩杯飲品，美祿恐龍嘅美祿粉無新加坡飲到嘅咁誇張，人地啲美祿粉成座山咁高；拉茶茶味淡，無練奶嘅香甜，都係茶記嘅港式奶茶好飲啲。咖央多士好脆，只食到甜味，無椰味同班蘭味；蝦麵同喇沙望落有啲似，不過兩個湯底係唔同嘅，喇沙正路，蝦麵個湯真係蝦味重啲，有蝦甜味，魚蛋唔腥唔彈，啲腩肉好乾好鞋，蝦係正正常常，唔好期望爽口彈牙，不過驚喜在於跟麵一齊上嘅辣醬，係蕃茄辣醬，好香濃蕃茄味，呢個一讚。細滲黎到，果然係combo，入面有金菇豆卜雞腳豬手豬肚豬腸，當中最好食係雞腳，唔係煮到爛溶溶，個湯有藥材味，不過好似聞唔到當歸香味，味道都可以；愛他愛她(睇餐牌係寫魚肉混有香料嘅魚條)，味道似泰式魚餅，但係肉質超淋，似粉團，呢個唔啱我口味。