馬祖台灣養生湯麵館 (留仙街) (已結業)

收早接先生放工，佢帶我嚟公司附近呢間養生料理，話午餐食過印象唔錯。一入門口就俾佢嘅燈飾同一大面壁畫牆吸引到，地方雖然唔算好大，但樓底好高，加上吊燈同壁畫，感覺好有空間感。餐廳主打台灣養生藥膳，以農場雞配以藥膳湯底，感覺零舍滋補健康。紅油抄手一客有五粒，雲吞唔算好大粒，但勝在夠彈牙，鮮味十足，辣油亦調較得恰到好處。醉雞湯底酒味都幾濃，反而雞味唔濃，雞肉鮮嫩，肉質有彈性，食得出幾新鮮，整體感覺好滋補，冬天食全身都暖哂。必須一讚佢嘅辣油，非常之香，配上豉油用嚟點雞一流。先生點嘅蟲草花雞湯底較濃郁，雞味鮮濃，個人亦較鍾意呢個湯底，將飯放入湯中做成湯飯非常好味！柑桔檸檬冰涼酸甜，非常清新。凍朱古力香濃得嚟唔會過甜，水準亦唔錯。平時出街食飯最怕就係好味到連湯汁都撈埋，喺到就真係可以飲哂啲湯都唔洗心虛，冬天飲更加係又滋潤又暖身。