HABITŪ caffè (已結業)

有事要過嚟金鐘政府合署搞點事，返公司途中，經過依間Caffe Habitu，因為仲未夠12:00nn食晏時間，所以偌大嘅店舖，都無乜幾多個客，在門外已聞到陣陣咖啡香，既然難得經過（平時極少晌金鐘留下小弟行蹤），就蛇一蛇王，入去嘆番杯咖啡先再上路。揀咗一入門口左邊窗門位，對著外街，看住匆匆走過嘅路人甲乙丙，自己卻安座晌寬闊嘅梳化之上，再睇睇書，雖然一陣要返去公司個人間煉獄，但係頃刻間幾有偷得浮生半日閒嘅愉快。點了一杯12安士鮮奶咖啡，店員隨手整個無乜難度嘅心形拉花，以佢哋日拉夜拉嚟講，依次唔算拉得好靚，而且杯身仲有少少溢瀉嘅咖啡漬。小弟對咖啡唔係咩專業，閒時都係晌屋企或公司沖三合一，但講到眼前杯咖啡本身，咖啡味香，口感柔和細滑，無澀無酸，啱晒我嘅口味。雖然只係蛇咗半笠鐘時間，返到公司都係等食晏，不過，鬆一鬆心靈倍感輕鬆！有人話三十幾蚊買杯咖啡貴，如果你心態係覺得用咗三十幾蚊淨係買到杯咖啡，確係幾貴，不如過隔離嘅MacCafe飲杯就算。但除咗咖啡以外，其實你仲享受咗寬敞嘅空間、寧靜嘅環境同舒適嘅梳化椅，三十零蚊一啲都唔叫貴！