蛇王二 (已結業)

老婆唔敢食蛇，今晚老婆約咗人，我梗係自己一個走去歎蛇羹啦……蛇王二喺銅鑼灣旺區,所以經常都人山人海要排隊至有得食。可能今日天氣轉熱，所以少咗人排隊， 今日我有運行唔使等位就有得食喇……蛇王二除咗有蛇羹之外，當然仲有各式各樣的燉湯和燒味。 其實呢度啲燉湯一啲都唔差，不過如果有得揀就梗係揀食蛇羹啦！！！今日我叫咗個蛇羹配燻蹄白切雞髀飯， 因為做完運動好肚餓，今日仲要食碟上加油菜， 簡直係超開胃套餐……蛇羹我咁講係全港島區最好食， 所以價錢偏高但依然客似雲來是有道理的！ 蛇羹食料豐富 食得出有瘦肉有 、木耳、冬菇、蛇皮、蛇肉等等， 分配啱啱好再加脆脆， 好味到不得了！！！至於熏蹄切雞髀飯亦都係我呢度嘅最愛， 燻蹄有微微酒香再加少少醋好好食, 至於今日嘅白切雞髀不是這裏最好水準， 但已經比不少食店好， 我鍾意食白切雞原因係好容易就食得出有冇雞味，高低立見！最後埋單差唔多130蚊 ，坐得又唔係好舒服 ，其實我覺得價錢偏貴少少，但係因為個蛇羹實在太好食，所以我仍會繼續幫襯！