一幻拉麵 (已結業)

喺新宿食過一次，一試難忘！除左一蘭，呢間係第二間過江龍拉麵店我會願意花時間排隊。中午1點去到，等左40分鐘，終於有位。好彩今日天氣唔算太熱，所以等40分鐘都可以。排隊期間，職員已經俾定紙仔我地填。口味除左原味蝦湯，仲可以要豚骨，不過本人覺得原味先可以食到蝦湯既精髓。入到去第一個感覺係冷氣好足夠，夏天食拉麵如果唔夠冷氣會好辛苦。而且座位好寬敞，一啲都唔迫，坐得好舒服。同男友一人一碗拉麵，再加一個蝦飯糰。我揀左原味蝦油鹽味粗麵。拉麵一到，影完相之後，第一件事當然係飲啖湯啦。如果未去過日本分店食，會覺得湯底好濃，蝦味好突出。但如果有比較之下，就一定覺得日本湯底濃味好多。麵質方面，都有3款，我揀左粗麵，因為我自己比較鍾意食有質感既拉麵。每一條粗麵都非常彈牙，又唔會太淋，軟硬適中。香港分店限定蝦味飯糰，一場黎到點都要試下。建議先食飯糰，後食拉麵。咁樣一來包住飯糰塊紫菜唔會因為接觸空氣太耐而淋左，二來食完拉麵飲完湯，口腔已經充滿濃烈蝦味，再食飯糰，就試唔真飯糰既蝦味道。店內職員都好好禮貌，如果未試過既朋友，都不妨一試！