Season Oyster & Wine Bar (已結業)

嚟到呢間以蠔著稱嘅餐廳，當然咩熟食都放埋一邊先，享受哂生蠔再算！我同另一半都唔係一食就十幾廿隻蠔嘅小朋友，所以都係order咗一人3隻唔同款，不過因為size食食都唔細，已經好夠喉！我哋叫咗納米比亞、美國黃寶石山蠔、太平洋珍寶石蠔，侍應都好幫手，教我哋一定要順住落咁食，味濃嘅要最後食，而最先就要食納米比亞先！海水味好輕，所以鮮甜味道好出，有清新感覺，好味！之後食黃寶石山蠔，咸味明顯比納米比亞重，個人喜好鮮甜啲，所以唔算好喜歡，不過肉厚都有滿足感。至於重頭戲太平洋珍寶石蠔，單係size已經不得了！足足手板咁長，不過同外形相比，佢嘅味道唔算係好濃，重點係好爽口好好咬，大隻滿足感係唔同啲！食完蠔當然就係熟食時間，我個人對大啡菇愛不惜手，今次都有叫個芝士黑松露焗大磨菇一嘗，好濃菇味，推薦！而黑松露牛肝菌薄餅都好好味，唔會太多醬汁，所以即使黑松露味道霸道，都掩蓋唔哂薄餅嘅味道，拿掐得幾平衡！至於主菜慢煮牛柳比想像中好，好多肉汁，同埋用士多啤梨汁配襯係幾得意嘅。不過當然啦，最好味都係蠔！