周記點心

營業中

休息中

近日秋高氣爽，難得同兩老一齊有假放，當然要行下山活動一下，就前進香港島去下薄扶林水塘。郊遊前要填肚，先係西環落腳。大清早，又同屋企人一齊，自必然首選飲茶食點心。蝦餃、燒賣為必然選擇。鮮蝦大大隻又爽口。燒賣好足料。鳳爪排骨飯，亦都水準中上。蝦多士係招牌菜，外層炸多士香脆，芝麻滿鋪，食落特別香口，蝦膠當然亦係啖啖肉，再點沙律醬，一流！果然係必食推介！唯獨是炸野始終比較熱氣，一件就夠晒數。 春風得意腸，即腸粉包春卷，亦都好味，腸粉皮薄，春卷入面都係啖啖蝦肉。不過兩樣熱氣野食，要二揀一既，都係非蝦多士莫屬。最後唔少得既，當然係紅極一時既奶黃流沙西多士！估唔到朝早都有得叫，幾飽都要試埋佢！睇住佢一切開，入面既奶黃餡湧泉而出，再食佢落肚，實在為人生一天樂事。雖然有些許熱氣，但都值得一試。好味既流沙奶黃包唔多，但總會搵到，而好味既奶黃流沙西多士，就真係只此一家。對住咁邪惡既食物，三個人竟然食得晒。食到肚滿腸肥，好彩最後都行左四五個鐘去消化。