嘉年華海鮮酒家 (已結業)

早幾日經過見到加設咗任食火鍋，趁weekend嚟試吓。酒樓面積大，不過冇幾耐差唔多坐滿。我諗任食火鍋喺度應該幾受街坊歡迎，一來呢度除咗一間＂地道＂酒樓有任食外，其他全部都係散嗌。而且價錢優惠，平日$118，假日$138全包，仲有雞煲揀，一家大細食最啱。醬料同部份火鍋料係自助，而且有少量熟食供應，真係好耐冇試過呢種火鍋方式。熟食方面有咖喱魚蛋豬皮、蘿蔔牛腩、炒粉麵飯等。唔講究賣相嘅話，味道都唔錯。雞煲味道還可，不過唔係麻辣嗰隻，亦冇出面食開有好多花椒芹菜嘅惹味。雞件偏細多骨，冇雞味。肥牛、水餃同部份丸要填火鍋紙。肥牛喺任食嘅質素嚟講算唔錯，餃類始終係偏細隻，食皮多過食餡。腸、炸魚皮、菜等都係自助。好多都係standard嘢，唔會太差。推介嘅係腐皮卷，其實十足點心料，不過用嚟打邊爐都好好食。但炸魚皮就淋咗，食咗一小塊已放棄。酒樓本身環境一般，加咗任食之後更加似屋村式酒樓。不過主要街坊生意，又唔會講究咁多嘅。以呢個價錢，有呢個食物質素已超值。下次唔想煮飯而又想打邊爐嘅話，都會考慮吓呢度。