極之雞煲烤魚涮涮鍋 (已結業)

今晚突然間戚起條根想食雞煲，見到呢間任食雞煲，於是就上咗去。嚟到嘅時候原本職員都話好full ，但係見我哋特登上嚟，最後都安排咗個位置俾我哋。呢度除咗打邊爐嘅食材之外都仲有好多熟食俾你揀，全部都係自助模式為主。當中我最欣賞嘅係佢呢部藥膳雞湯，真係好足料，好夠味。佢呢度嘅特色係雞煲可以任食，而佢個份量係跟人頭嚟比嘅，基本上一開始都會有至少半隻雞。而我哋兩個人都只係加咗一次，個質素唔會因為你係任食而下降，都一樣係啖啖肉，但係你就可以自己更改你需要嘅辣汁程度。食完晒之後，你可以自己加湯，然後落單叫肉打邊爐。我哋揀咗中間嘅餐，所以可以食到兩款牛一款豬。另外仲有脆肉鯇同埋鱔片可以揀。而打邊爐嘅其他料就可以出去自己拎。其中有一樣特色嘢，就係佢哋自家製嘅韭菜餃，佢個韭菜餃用嘅肉係牛肉，所以食手落都幾香。除咗打邊爐之外，佢仲有一啲串串可以叫。我哋就叫咗少少嚟試吓，因為都係炸物為主，都係啲香口嘢。食完之後除咗普通嘅雪糕之外，佢都有一啲生果同埋自家製糕點做甜品。飲品方面，更加係超過20款，其中我就飲咗佢嘅支裝可樂，同埋自家製茶飲。