富臨皇宮 (已結業)

友人喬遷欣榮花園入伙，上去探吓小朋友，友人盛意拳拳邀請留下晚飯，樓下有富臨皇宮，近近地都好。以前食過富臨皇宮其他分店，感覺上質素麻麻，不過友人話都幾好咁是但啦！見到有龍躉兩食228，依家喺街市買龍躉肉炒球都要過百，酒樓有人整埋都抵食。龍躉肉多骨少，小朋友都食到，就叫呢個。另外做緊特價燒鵝例牌20蚊，真係抵到極，又叫。再叫多個泰皇蝦腰炒通菜，三大一小都夠食喇。燒鵝例牌都有脾位，雖然件數不多，但20蚊真係冇得要求。燒鵝微暖，鵝皮尚叫脆口，鵝肉比較痴骨，可能緊緊熟，燒得透啲會更好。清蒸龍躉頭腩有少少碎骨，大人比較啱食。龍躉頭腩都有好多肉，龍躉皮膠質豐富。西蘭花炒龍躉球嘅龍躉球就啖啖肉，小朋友都鐘意食，西蘭花比較硬，炒耐少少腍返啲會更好食。泰皇蝦腰炒通菜幾惹味，都有唔少蝦仔，個菜唔算辣，咸香味濃啲。四個人都係食咗400蚊，街坊酒樓有時唔煮飯落樓食不失為好選擇。