鳳城酒家 (已結業)

要吃價廉物美的中式點心，除蓮香外，鳳城幾時都是唔錯選擇。唔記得幾時轉晒做惕紙仔叫點心，坐邊位亦無乜所謂，幾味點心叉燒包、潮州粉果、蛋黃蓮蓉包、鳳爪、山竹牛肉，仲有烏龍經理同場加推的炸韭菜餡角。幾味包點幾乎是即叫即上，叉燒包一盅兩件，熱辣辣夠軟熟，叉燒有粗有細，亦有老酵發出的獨特包香，不錯；蛋黃蓮蓉包同樣是一盅兩件，薄薄饅頭皮包著香滑的蓮蓉同蛋黃組合，未及蓮香澎湃，但作為小包點吃，也很滿足。幾味餡點最喜歡但又有點失望的是潮州粉果，可能是長蒸關係，澄面皮一夾即穿，再夾再穿，反而蘿蔔、韭菜、蝦粒餡料炒得夠香亦不散，味道極豐富，是明知穿都要叫既一味。山竹牛肉是迷理版的肉球，每次飲茶都會叫，但帶著回憶吃呢味，總不是味兒，這裡的不太差，也有豐富的芫茜味，對辦。烏龍經理慷慨地找來韭菜餡角，炸得乾身亦有韭菜香，較炸雲吞更有個性，埋單都不過$45/位，飽得喝了幾壺普餌消滯，物有所值。