泰廚泰國菜館

營業中

休息中

今日放工要同老婆出旺角幫屋企班大帝買乾糧，幫完佢地買野食，咁就梗係輪到我倆醫一醫肚，呢間食店嘅門口有員工燒串燒，香噴噴，我眼見都有好多人都排隊買串燒食，我未食都已經流口水，所以決定入去試。等咗一陣就可以入去，舖頭唔算大，但係有兩層，我哋坐地下果層，晚市都好多人食。先點個細嘅小食拼盤 $68，串燒的確出色，雞肉同豬肉都嫰滑無比，再配上香濃嘅沙爹汁，唔怪得咁多人排隊啦。馬拉盞肥牛通菜 $67老婆至愛，所以點咗呢個餸，通菜同肥牛都好嫩，好多馬拉盞汁淋上面，可能我地冇撈均，所以覺得咸咗少少。泰式明爐烏頭魚 $94呢度每晚都有一個特價餸，今晚係烏頭，另外仲有一碗湯配埋，將啲湯淋上魚身，再配埋香茅，滾番起再飲，正 !泰式生蝦 $1原來食滿二百蚊，仲可以加一蚊配一個小食，生蝦肉身非常爽口，配埋個生蝦醬汁，少少酸辣，good !椰青 $33食泰菜點可以冇椰青，青甜透心涼。