李強記煮意 (已結業)

今日北角過海去土瓜灣，搵完朋友聚舊，專登順便周圍睇下，一心搵個好地方食個靚晚飯。阿仔話好想食炒小菜晚飯。行咗一陣開始落雨，咁啱就行到呢間「李強記煮意」。餐廳門口擺放了餐牌，見到都有不少家常小菜，加上店鋪裝修嶄新，相信應該新開張不久，見環境不錯，一於就試下。入坐後發現原來都有不少街坊食客。店員介紹晚飯小菜套餐，包白飯，加$3可以加凍飲。最後選了阿仔最愛《魚香茄子》（$68）同埋《啫啫雞煲》（$88）。兩個餸即叫即煮，魚香茄子十分夠鑊氣，茄子煮得好好，色澤好靚，保持到茄子嘅紫色，肉碎咸香又熱辣辣，真係色香味俱全，送飯一流。啫啫雞煲用沙煲上檯，仍聽到沙煲被加熱後的「炸炸」聲，啫啫雞嘅香味撲鼻，即刻急不及待要食，不過真係要小心燙嘴。雞肉嫩滑，配上冬菇、乾蔥頭、洋蔥、青椒配菜，味道調得恰到好處，最後清曬所有食物，一舊都冇剩。小菜套餐，除送白飯，亦有免費例湯。今晚係紅蘿蔔排骨湯，啱曬冇時間自己煲湯嘅打工仔。而兩個餸份量亦十足，味道相當不錯，想品嗜一下有鑊氣家庭小菜，飲番啖冇味精靚湯，有機會大家一定要嚟試下。