百匯酒家 (已結業)

純粹見佢地點鄰近紅van總站，臨入去石澳泳灘前飲個早午茶。正門去番東大街方向入。十點鬆啲仲係早餐時段，冇得嗌炒嘢，所以成枱得點心，頂多有盅飯。雙寶入面柴魚豬骨粥嚟到差啲以為白粥，𢳂咗四五下先搵到一粒仔豬骨，柴魚碎絲好似沒入咗碗粥，基本不多見，當白粥食嘅感受；煎釀茄子還可以，至少鯪魚肉唔會無啦啦食到有魚骨，茄子冇過生過老。紅油抄手想跟番大陸嗰啲做得的的骰骰細細粒，汁底預咗佢做唔到咩層次，但餡料毫無豬肉鮮味、餃子皮質感亦一般，埋尾堆疊出嚟嗰塊厚皮都忍唔住咬走唔要。少見仲有豬腳薑，蛋冇變鐵蛋尚且柔滑感，豬腳炆得幾夠腍除咗骨外全部咬到食到，醋底係預期內始終唔及自家煲嘅濃厚。