金記冰室 (八號花園) (已結業)

疫情期間不宜外出用膳，所以近排都多咗留喺屋企食飯。今日想躲下懶，老公提議不如近近哋，去附近買外賣，唔使煮又唔使洗，乾手淨腳。揀咗位於康怡廣場嘅街坊飯堂「金記冰室」，估唔到嚟到嘅時候只係啱啱過咗六點鐘，門口已經企滿等外賣嘅客人，可見附近嘅街坊都相當捧場。揀咗兩個晚市套餐，套餐包熱飲同是日例湯，這晚嘅例湯係雪梨粟米無花果煲豬骨湯，雖然等咗一段時間先飲，但湯身入口仍然是暖笠笠，入口清甜溫潤，養陰潤燥，用作抗疫湯水就最適合不過。馬來咖喱牛腩飯 ($75)：牛腩份量極多，足足有成 7、8 件，件件都肥瘦適中，而且燜得軟腍入味，入口一點也不柴皮，相連的軟筋膜亦爽滑不韌。咖喱汁辣味較重，但又未致會蓋過牛腩的肉味；薯仔吸收了咖喱汁的味道，用來配白飯吃一流。芝麻黑糖醋骨 ($75)：糖醋骨賣相唔錯，面頭灑上了少許白芝麻，入口甜甜地又帶點黑醋的酸香，而且食落仲保持住炸過的香口，脆得嚟又唔痴牙。白飯粒粒分明，乾爽有嚼勁。