一漁外賣壽司 (已結業)

近幾年新開嘅街市，往往都會有一條"食街"，有好多唔同嘅外賣店，車仔麵、兩餸飯、餃子等等應有盡有，之前見到開咗呢間壽司店已經想試下，今日終於有機會了。餐廳除咗刺身同壽司外，亦有唔同款式嘅飯，每個飯餐仲包紙包飲品或麵豉湯。雜錦刺身丼 : 賣相色彩繽紛，刺身有三文魚、帶子及吞拿魚，配上玉子及青瓜，面頭再鋪上滿滿嘅蟹籽，非常豐富。刺身每樣都好新鮮，配埋醋飯食一流。日式叉燒丼 : 日式叉燒好淋好入味，加埋日式甜豉油，非常開胃；另外仲配上大量嘅菜，令整體感覺清新同無咁油膩。飯餐加15蚊可以配一份蟹肉忌廉餅，喜愛炸物嘅我地梗係要試下。蟹肉忌廉餅即叫即炸，返到屋企都仲係熱辣辣，入口外脆內軟，有好濃蟹味，每人一件真係唔係幾夠喉。太卷 :一份有四件，大大件包住玉子、青瓜、蟹柳及蟹籽，味道唔錯。