水木日本料理 (已結業)

之前嚟過一次，當時朋友推介嗰款水木便當，話個定食好大座好震撼。但係店員當時話要預約落order先有，而且每日限量十份，我地order得太遲所以試唔到，失望而回……今次再有機會嚟，所以一早打上去order水木定食，點知接線生話唔需要pre order，到時上去嗌就得。我心諗”唔係呀嘛"，但係佢講到咁樣我都冇辦法啦，唯有去到先order啦……最後上到去又order到喎，真係唔知佢地搞邊科 =.=可能係灣仔區餐廳食午飯既通病，上到去好多客人但係侍應人手不足。建議諗曬成枱嘅order先至叫侍應，唔好為難人地。水木便當上菜時真係幾大坐嘢，不過老實講，佢咁大座都係因為將啲食物一層層疊起來，到最後食嘅時候咪又係攤開嚟擺喺枱面，雖然個賣相又真係幾好嘅，起碼有人記得。呢度嘅食物平均都係中上嘅日本餐嘅質素，魚生好鮮味，壽司飯調味都唔錯，天婦羅又炸得脆。基本上食物方面都係不過不失，對得住個價錢嘅。另外，每樣食物份量都唔會太多，打工仔做嘢做到好攰喺度食午餐都會幾開心，又唔怕飯氣攻心。以灣仔眾多要排隊嘅餐廳當中，佢算係性價比唔錯嘅選擇，只係員工唔係幾夠人，服務冇跟到咁貼。見到啲員工全部都咁頻撲其實應該考慮加人手