羅麥記 (已結業)

近期去開新都城上堂，就同同學女一致決定，每日試一間食店。記得當日既堂實在太悶太眼瞓既關係，所以就一定要搵一間有奶茶咖啡既餐廳食lunch。當日行過見到餐牌呢杯粒粒奶茶，大家就決定入去一試。如果單叫就$38，跟食物再叫特飲就只係加$18，杯奶茶一到，最吸引我既就係粒“紅豆冰”，整粒紅豆冰係用奶茶雪成粒狀，當慢慢飲時，粒冰就會慢慢解凍，所以茶味並未因為冰量而減淡，食完碟麵再飲番都仍然有好濃奶茶味，而且重係好滑添！當個個都叫撈丁撈麵時，我就第一次見用腐乳來撈，愛試新口味既我，當時要一試。可惜‥‥‥腐乳味重左，就算撈開之後，個人覺得都係重左少少，而且麵身煮得太“林”，再加上腐乳汁，無左麵應有既彈性，好彩就係雞扒入味嫩滑，帶有腐乳味都係一個幾特別既煮法。